Merdang-merdem, biasakape igelari Kerja Tahun, Ngerires, nimpa bunga benih ras sidebanna. Ibas bulan Juni sireh enda, kuta i Kec. Tiga Binanga-Singalor Lau, erbahan merdang-merdem, emaka kari ibas bulan Juli i Kec. Kuta Buluh, Bulan Agustus i Juhar, terus ku bulan Oktober i Simpang Empat.
Ibas bulan-bulan enda biasana nai, enggo salang sai pendahin i juma, peranin enggo dung, bagepe merdang sinuan-sinuan ibas musim simbaru enggo mulai ibenaken litpe deba enggo dung. Emaka tanda meriah ukur, ras nambari ate tedeh man kade-kade ibanme merdang-merdem. Pengulu runggu ras anak kuta nentuken wari si mehuli, menurut kebiasan si adi emkap ibas wari beras pati medem, gelap bulan enggo kenca dung Tula. Nangdangi warina, emaka ibahan me gotong royong pesai kuta, dalan, tapin ras sidebanna, lit ka deba ngecet rumah, nggusgusi kudin ras selembut.
Merdang-merdem enda lit telu wari dekahna, wari si pemena igelari mantem, entahpe motong, emkap wari nikapken gulen, i potongme lembu si itukur ras-ras sinigelari erbante. Adi nai, nina lembu enda i pantem salu lembing, emaka i gelari mantem.
Anak perana nampati mamana nikapken gulen, ergat-gat kurumah mama, singuda-ngudape nampati ku rumah bibina nggiling cina ras pesikap piring tahpe amak, kade-kade si tading ikuta sideban mulai ruh maba luah i kutana nari, ndahi kalimbubu bagepe anak beru ras senina. Singuda-nguda ras anak perana si mantek nikapken guro-guro aron adilit kin ibahan gendang guro-guro aron, la ketadingen danak-danak erbaju mbaru, babah kemuit cingat-ngat mangani luah tahpe sinitukur bas perbinaga nari. Gara cimber api i rumah ras i ture maba bau daging tutungen, gat-gat, rendang bagepe bau terites. Emaka kenca ben wari, temue sitandang kuta dauh nari mulai ruh ku rumah, ipesikap nakan pangan, anak perana singuda-nguda mon-mon lanai bo tandai simada rumah, kerina i pesikap nakanna, ibaba ertutur, emaka tambah kade-kade tambah teman. Enggo terbegi sora gendang i los, bapa aron ngiah-ngiahi aronna i los nari, lit ka deba ngelegi aron ku rumah, ndarat kebaya simejilena, uis sierndilapna rikutpe kampoh si merimna. Meriah akap anak kuta, mantek permen ras bere-bere, mejile perlandekna, surak orang tua, enggo kepe mbelin bebereku, permenku atena.
Emaka wari peduaken, kenca terang wari, emkap wari Matana, sidahi-dahin ku rumah kalimbubu ras anak beru, kerina kade-kade reh ku jabu, ibas wari enda me siiteh pergeluh kade-kadenta, anak enggo mbelin ras sidebanna. Ibas kerina rumah sinidahi isikapken rusur nakan tah pe inemen, emaka banci seh 10 kali kita man sada wari (bas paksa merdang-merdem melala kalak gawah/mesui beltek), maler panas perban erdalin kekerumah.
Wari peteluken, emkap nimpa-nimpa, erbahan cimpa, man luah mulih kade-kade. Anak perana singuda-ngudape ikut erbahan cimpa. Latih tuhu daging perbahan kurang perpedem, ngalo-ngalo kade-kade tapi ukur meriah, mulih kade-kade ku kutana.
Endam merdang-merdem di Singalor Lau. Gundari enggo melala perubahan, tapi makna ras jiwa merdang-merdem lalap nggeluh.
Tahun 2008 enda merdang-merdem i Perbesi tanggal 27/28, ruh kam, rumahta i Rumah Jahe.
Bujur
Ibas bulan-bulan enda biasana nai, enggo salang sai pendahin i juma, peranin enggo dung, bagepe merdang sinuan-sinuan ibas musim simbaru enggo mulai ibenaken litpe deba enggo dung. Emaka tanda meriah ukur, ras nambari ate tedeh man kade-kade ibanme merdang-merdem. Pengulu runggu ras anak kuta nentuken wari si mehuli, menurut kebiasan si adi emkap ibas wari beras pati medem, gelap bulan enggo kenca dung Tula. Nangdangi warina, emaka ibahan me gotong royong pesai kuta, dalan, tapin ras sidebanna, lit ka deba ngecet rumah, nggusgusi kudin ras selembut.
Merdang-merdem enda lit telu wari dekahna, wari si pemena igelari mantem, entahpe motong, emkap wari nikapken gulen, i potongme lembu si itukur ras-ras sinigelari erbante. Adi nai, nina lembu enda i pantem salu lembing, emaka i gelari mantem.
Anak perana nampati mamana nikapken gulen, ergat-gat kurumah mama, singuda-ngudape nampati ku rumah bibina nggiling cina ras pesikap piring tahpe amak, kade-kade si tading ikuta sideban mulai ruh maba luah i kutana nari, ndahi kalimbubu bagepe anak beru ras senina. Singuda-nguda ras anak perana si mantek nikapken guro-guro aron adilit kin ibahan gendang guro-guro aron, la ketadingen danak-danak erbaju mbaru, babah kemuit cingat-ngat mangani luah tahpe sinitukur bas perbinaga nari. Gara cimber api i rumah ras i ture maba bau daging tutungen, gat-gat, rendang bagepe bau terites. Emaka kenca ben wari, temue sitandang kuta dauh nari mulai ruh ku rumah, ipesikap nakan pangan, anak perana singuda-nguda mon-mon lanai bo tandai simada rumah, kerina i pesikap nakanna, ibaba ertutur, emaka tambah kade-kade tambah teman. Enggo terbegi sora gendang i los, bapa aron ngiah-ngiahi aronna i los nari, lit ka deba ngelegi aron ku rumah, ndarat kebaya simejilena, uis sierndilapna rikutpe kampoh si merimna. Meriah akap anak kuta, mantek permen ras bere-bere, mejile perlandekna, surak orang tua, enggo kepe mbelin bebereku, permenku atena.
Emaka wari peduaken, kenca terang wari, emkap wari Matana, sidahi-dahin ku rumah kalimbubu ras anak beru, kerina kade-kade reh ku jabu, ibas wari enda me siiteh pergeluh kade-kadenta, anak enggo mbelin ras sidebanna. Ibas kerina rumah sinidahi isikapken rusur nakan tah pe inemen, emaka banci seh 10 kali kita man sada wari (bas paksa merdang-merdem melala kalak gawah/mesui beltek), maler panas perban erdalin kekerumah.
Wari peteluken, emkap nimpa-nimpa, erbahan cimpa, man luah mulih kade-kade. Anak perana singuda-ngudape ikut erbahan cimpa. Latih tuhu daging perbahan kurang perpedem, ngalo-ngalo kade-kade tapi ukur meriah, mulih kade-kade ku kutana.
Endam merdang-merdem di Singalor Lau. Gundari enggo melala perubahan, tapi makna ras jiwa merdang-merdem lalap nggeluh.
Tahun 2008 enda merdang-merdem i Perbesi tanggal 27/28, ruh kam, rumahta i Rumah Jahe.
Bujur
